Најдобро уредените продавници во градот што имаат штандови со храна, но и средства за хигиена. Кај нив никогаш нема храната да мириса на детергент како во други маркети. Производите им се исклучителни, хигенските за сите достапни. За нив секоја недела може да се прави топ листа најпосакувани, од боровница слатко со 70 отсто овошје, до ролните украсна хартија.

Не секоја ленена облека е добра. Овојпат ќе ја спомнеме ленената облека во Интимисими: таа е најлесна од сите и во актуелни бои. Ако веќе некому купувате нешто, спакувајте го во нивните минијатурни кутии. Затоа што кошулите и маиците од лесен лен, ќе ги собере и во нив.

Македонски бренд, македонски дизајн, македонско производство. Најубавата продавничка на сквер Јадран уште поубава во лето. Ако сакате да однесете или да пратите поздрав од Скопје, таму побарајте го. Торба, капче или маица со цртеж. Сѐ е убаво.

Книгата “Дефинитивниот водич низ говорот на телото” од Алан и Барбара Пиз, започнува со мисла на Шерлок Холмс: “Ноктите на човекот, ракавите на капутот, чизмите, колената на панталоните, изразот на лицето, манжетните на кошулата, движењата – секоја од тие работи непогрешливо ја открива професијата на човекот…”
Читајте што кажува телото, а не кажуваат зборовите што некој ги изговара.

Летни грмушки! Лавандата и хортензијата се убавата страна на летните бавчи. Цели грмушки кои бараат двор и голема површина, и сонце и сенка, влажност од небото или од човекот, a враќаат со мирис и убавина. Лавнадата со еден од најубавите мириси на светот, хортензијата со еден од најубавите цветови.

Тие го измислија новото дружење меѓу соседите. Ги натераа да излезат од зградите, да ги отворат вратите. да се дружат, да се видат, да се забавуваат, да слушаат музика, и на крајот, деновиве, да слушаат опера. Во тревници и од балкони. Некој треба да ги одликува. Прават невозможни работи.

Ведран, детето со маслинките, пред сѐ е многу интелигентно дете. Заинтересирано за сѐ, многу симпатично, дружељубиво, слатко и полно со љубов. Возрасните треба да се угледаат на него. Може и да ги подучи за многу работи во животот. И да им го збогати вокабуларот со убави зборови.

Сладоледот не е како другите. И тие не се како другите. Само што помина нивниот пикник во Градски парк. Но и понатаму ги имате сладоледите во Градски парк, разни вкусови сместени во автомобилче. И убав корнет. Нема поубаво место од парк за да се јаде сладолед.

Готвењето треба да биде весела работа. Треба да биде интересна работа. Готвењето треба да биде убаво за око и вкусно како што се јадењата. Готвачите треба да бидат позитивни луѓе, интересни луѓе. Кулинарското шоу на Телма “180 степени”, не спаѓа во такво шоу.

За претседателката го имаме истиот совет како за Тимчо последен на оваа листа. Книга за говорот на телото што открива многу повеќе од она што таа навистина го прави и кажува.Можеби ќе ѝ помогне да сфати каков впечаток остава.

Мекото ткиво што ѝ носи само штета на државата.Веќе ги знаеме ужасните метaфори што ги користат ВМРО ДПМНЕ. Недостатокот на избрани зборови, меко ткиво или не, единствена меатфора што ја смислиаја овие две години, укажува само на едно – свртување внимание од сиромашен вокабулар и вистински напредок.

Протоколи, историски комисии, петнаесетина нови барања и тн. тоа има да каже премиерот веќе две години за диктатот на Бугарија.Ни напред ни назад не одиме. Додека државата осиромашува и сѐ повеќе луѓе се хранат од контејнери или воопшто не се хранат, со што да се манипулира освен со лажен патриотизам и пропаганда.

Цели 62 метра бил еден од мостовите во изградба на железничка делница. Инженерско чудо бил! Каков ќе беше светот ако сите пруги беа по долини, нема кој да му каже на Николовски. За кој секој инфраструктурен потфат е инженерско чудо! Пропаганда за добро утро, добар ден и за цел ден.

Да може да се види каде се прави сладоледот што се продава во фрижидерите низ град, најверојатно ќе се заклучи дека кај малкумина тоа не е сладолед направен од прашок во винилна кеса. Она што го покажуваат Италијанците и нивната мајсторија за правење џелато наочиглед на сите, тоа овде нема да го видите.

Какви им се составите на плакарите откако со години се пратеници и министри во оваа недржава? Зашто само тоа може да се види на говорниците. Костуми, кравати, фустани, накит, фризури…ништо друго. Но да. И невкус.

Треба да ја прочита книгата што ја препорачавме за говорот на телото, за да сфати што прави. Да си го анализира изразот на лицето и гестикулациите. Колку од она што го кажува навистина го мисли, во таа книга сѐ пишува.