Скопје е полно со кафетерии. Преполно. Кафе се пие на секој чекор и се седи со часови секаде каде што е ставена столица. Но ретки се местата каде што кафето не остава блуткав и горчлив вкус во устата, точно за да потврди дека кафето по силата на вистината е – горчливо.

Затоа кафетеријата EDGE што се наѓа на улицата Дебраца 13, е исклучок од правилото дека во овој град сѐ се нарекува кафе. Како да се крие од сите други места во улицата што се крие од другите улици, во оваа кафетерија работат луѓе што веруваат дека убавото кафе не е само пијалак туку и искуство.

За многумина зборувањето за кафето е банално, иако се активни пијачи на кафе. За тоа многу би им замериле Италијанците, кај кои кафето е ритуал и прави разлика во вкусот. Да се испие еспресо од нога, една голтка на пауза од работа, значи да се продолжи денот некако повесело и со поголема енергија. Вкусот значи многу и не се пие за да се има изговор за губење време, туку се пие за да се ужива. Познато е дека и на бензинска пумпа на прашлив пат во некое италијанско село, ќе ви биде послужено беспрекорно кафе. Ако нарачате капучино, ќе добиете и срце во беспрекорната пена.

Токму таа тајна на внимателност во изборот на кафе ја има EDGE или неговата газдарица Никол што е дојдена од Чешка. Би требало да знаете дека и како пиeњeтo кафе што таа многу често сама го спрема и кафето е првокласно чешко. Стои на сталажи убаво спакувано во шарена амбалажа ако сакате да си го купите за дома. Личи како да праќа бакнежи и насмевки повикувајќи на внимание.

Нема спектакли во оваа кафетерија. Не се покриваат недостатоците во она што се служи со ентериер за одлекување на внимание. Сѐ е едноставно и дише со природност. Боите се смирени, масите и столчињата уредни и еднолични, мали клупи и ниски масички од кои нема да си ги удирате нозете и неколку масички надвор на сонце. Ако носите цвеќе со себе, секогаш ќе биде украс за нивните инстаграм фотографии комбинирани со убава цимет ролничка и кафе со беспрекорен изглед и вкус.

Секој што ќе помисли дека сите кафетерии се исти треба да знае дека местата ги чинат луеѓто и привлекуваат слични луѓе. Млади парови со мали деца или момчиња што седат со испружено нозе во конверс патики, што му пркосат на топлиот асфалт. Градска слика, урбан амбиент дополнет со блискиот графит на една од соседните згради.

Капучино или макијато со овесно млеко и цимет ролничката е за нас на врвот на листата EDGE фаворити, но има и некои верзии на пијалаци со мача за љубители на трендови што доаѓаат и проаѓаат. Квалитетот останува. И атмосферата што дава извесна интимност на посетителите што сами се послужуваат. Никој не го нарушува интегритетот и времето што сакаме да го поминеме тука. Затоа е убаво место, различно и свое. Кафетерија со потпис.

EDGE тивкото место за делење кафе, цимет ролнички и искуства

пишува Офелија Димковска

Можеби ќе ти се допадне

Париз на едно место гореше, на друго навистина славеше

НОВИОТ ПРЕДМЕТ НА ЖЕЛБА ги затвори продавниците за часовници